VIONGOZI WA DINI KUUNDA UMOJA WA KUPAMBANA NA MAUAJI YA VIKONGWE.

BOFYA HAPA CHINI KUONA MAAJABU YA LEO

MKUU wa wilaya ya Kahama,Fadhili Nkurlu,amewaagiza viongozi wa dini kuunda Kamati ya Amani,kusudi washirikiane na Serikali kukabili na kutokomeza mauaji ya vikongwe kutokana na imani za kishirikina,yaliyokithiri wilayani Kahama.

Agizo hilo alilitoa juzi katika Baraza la Iddi,lililofanyika kimkoa wa Shinyanga,wilayani Kahama katika ukumbi wa Halmashauri ya Ushetu,ambapo aliwaomba viongozi wa dini kutoa ushirikiano kwa serikali katika mapambano dhidi ya mauaji ya vikongwe,ambayo yanarejea kwa kasi wilayani Kahama.

Nkurlu alisema ni vyema Kamati hiyo ikaundwa  kwani itakuwa msaada mkubwa wa kudumisha amani,kutokana na kuunganisha viongozi wa dini kutoka madhehebu mbalimbali na kuomba kazi ya kwanza kuifanya ni kuhakikisha wanawaasa waumini wao juu ya athari ya kuua vikongwe kutokana na imani za kishirikina.

“Mauaji ya vikongwe yanarejea kwa kasi wilayani petu,wiki hii pekee vikongwe vine vimeuawa katika Kata za Chambo,Iyenze,kijiji cha Nyashimbi Kata ya Mhongolo,na leo hii Kikongwe ameuawa Kata ya Segese,na imani viongozi wa dini mkiingilia vita hivi tutakomesha mauaji hayo,”alisema Nkurlu.

Aidha Nkurlu alisema kuundwa kwa kamati hiyo kutazidisha amani kwa kuondoa migogoro ya kukashfiana baina dhehebu na dhehebu,hali itakayofanya jamii kuzidi kuishi kwa amani na upendo,huku kamati hiyo ikiwajibika kushirikiana na serikali kutokomeza mauaji hayo pamoja na matumizi ya madawa ya kulevya kwa vijana.

Awali akimkaribisha mkuu wa wilaya,Kaimu Sheikh wa wilaya,Sheikh Ramadhani Damka,alisema wilaya ya Kahama wakazi wake ni wakarimu na wapenda maendeleo,lakini wanakabiliwa na changamoto kadhaa ambazo viongozi wa serikali wanahitaji kutumia hekima kuzitatua.

Hata hivyo Sheikh Damka alisema sifa ya wilaya ya Kahama inaharibiwa na baadhi ya maeneo,kunakofanyika vitendo vya mauaji ya vikongwe na albino kwa imani za kishirikina,ambapo viongozi wa dini wanajitahidi kusimama imara kuiasa jamii kuepuka matendo hayo yasiyompendeza Mwenyezi Mungu.

Kwa upande wake Sheikh wa Mkoa wa Shinyanga,Alhaji Sheikh ismail Habibu Makusanya,alimkumbusha Mkuu huyo wa wilaya umuhimu wa viongozi wa dini katika suala la kusimamia amani nchini,kuwa ni mkubwa kutokana kuwa na watu wengi nyuma yao,hivyo ni vyema serikali ikawapa kipaumbele kila wakati si kwenye kipindi cha shughuli za kitaifa tu.

Alhaji Sheikh Makusanya alisema ni vyema serikali ikaondokana na kasumba ya kuona umuhimu wa viongozi wa dini pindi kunapokuwa na ugeni wa Kitaifa ama yatokeapo majanga,wanastahili muda wote kupewa kipaumbele na serikali,kwani wanafahamu mengi maovu yenye athari kwa jamii kwa kuwa wanayoyatenda ni miongoni mwa waumini wao.

Baraza la Idi kimkoa ni mara ya kwanza kufanyika wilayani Kahama,ambalo lilitanguliwa na sala yake iliyofanyika katika viwanja vya Shule ya Sekondari ya Kahama Muslimu,ambapo viongozi wa dini waliwaasa waumini waliohudhuria ibada hiyo suala la upendo,kuvumiliana na kumcha Mwenyezi Mungu.

KUONA VIDEO MPYA BOFYA HAPA CHINI