SERIKALI YATUPA MAOMBI YA KUHAMISHA MAKAO YA HALMASHAURI

BOFYA HAPA CHINI KUONA MAAJABU YA LEO

MGOGORO wa sehemu itakayojengwa Ofisi za Makao Makuu ya Halmashauri ya Msalala,wilayani Kahama,mkoani Shinyanga,umeanza upya kufuatia msimamo wa Serikali kuagiza yajengwe Busangi huku Madiwani wengi wa Halmashauri hiyo wakitaka yajengwe katika Kata ya Mega.

Hayo yalibainika jana katika Kikao maalumu cha Madiwani wa Halmashauri ya Msalala na Mkuu wa Mkoa wa Shinyanga,Ally Rufunga,alipowasilisha tamko la Serikali kupitia ofisi ya Rais,Tawala za Mikoa na Serikali za Mitaa “TAMISEMI”.

Rufunga alisema Serikali imeyakataa maombi ya Madiwani hao,kutaka Makao Makuu hayo yahamishwe Kata ya Busangi na kupelekwa Kata ya Mega,kama suluhisho la mvutano wa muda mrefu wa Makao Makuu hayo kujengwa Busangi ama Segese.

Mkuu wa Mkoa wa Shinyanga alisema Madiwani kupitia vikao vyao halali walipendekeza Makao Makuu ya Halmashauri hiyo yawe katika Kata ya Busangi na baadae walipendekeza kubadili Makao Makuu hayo yahamishiwe katika Kata ya Segese.

Mkuu wa Mkoa huyo alifafanua kuwa hali hiyo ilileta mvutano kati ya madiwani hao hadi kuanza mchakato mpya wa makao makuu hayo kuhamishiwa Mega na kabla ya hatua yoyote kuchukuliwa Serikali ilitoa maelekezo ya kukataliwa kwa maombi ya kwanza ya kuhamishia Segese.

Kufuatia kwa kauli hiyo Rufunga aliagiza kuanza kwa ujenzi kwa Makao Makuu hayo katika Kata ya Busangi,na yule ambaye ataona  hajaridhishwa na uamuzi huo wa Serikali,wakiwemo Madiwani wanatakiwa kujihudhuru nyadhifa zao ili waachie watu wengine kuongoza.

MWENYEKITI wa Halmashauri Msalala,Mibako Mabubu.

Mwenyekiti wa Halmashauri hiyo,Mibako Mabubu,alisema kwa upande wake pamoja na Madiwani  hawako tayari kukubali agizo hilo kwakuwa walikubaliana kubadilisha kwa wingi wa kura na kwamba kiongozi mmoja tu {pasipo kumtaja jina lake},ndiye anayeisumbua Serikali.

Mabubu alisema hata ushauri wa kutafuta sehemu nyingine nje ya Busangi na Segese,na kupendekezwa Mega ulitolewa na Mkuu wa Mkoa,Rufunga na Madiwani wote kuafiki lakini kiongozi huyo alienda TAMISEMI kuzuia azimio hilo halali la Madiwani.

Alisema Madiwani walikubaliana kupeleka Makao hayo Mega,pia Kamati ya Ushauri ya Maendeleo ya Wilaya “DCC”nayo iliafiki na kilichokuwa kikisubiriwa ni kikao cha Kamati ya Ushauri ya  Maendeleo ya Mkoa “RCC”kupitisha na kupeleka TAMISEMI na kwamba wameshangazwa na kauli hiyo ambayo hawako tayari kuikubali.

Mgogoro wa sehemu ya kujengwa Makao Makuu ya Halmashauri ya Msalala ulianza mwaka 2013,bila kufikia suluhisho la kudumu huku baadhi ya viongozi na wananchi wakidaiwa kuendeleza marumbano kwa njia za siri hali inayodumaza  maendeleo ya Halmashauri hiyo.

KUONA VIDEO MPYA BOFYA HAPA CHINI